वर्धा : येथील पोस्ट ऑफिस पासपोर्ट सेवा केंद्राला केंद्र सरकारने मंजुरी दिली आहे. पोस्ट ऑफिस पासपोर्ट सेवा केंद्र योजनेला मिळणारा वाढता प्रतिसाद बघता १७ जून रोजी केंद्र सरकारने १४९ ठिकाणी नवीन पोस्ट ऑफिस पासपोर्ट सेवा केंद्र सुरू करण्याचा निर्णय घेतला. त्यामध्ये वर्धा पोस्ट ऑफिस केंद्र मंजूर झाल्याची माहिती वर्धा खासदार रामदास तडस यांनी प्रसिद्धीपत्रकाद्वारे दिली.
वर्धा जिल्ह्याचे ठिकाण असूनही पासपोर्ट सेवा केंद्र नसल्याने नागरिकांना नागपूर प्रादेशिक कार्यालयात जावे लागते. ही अडचण लक्षात घेऊन खासदार रामदास तडस यांनी १६ नोव्हेंबर २०१६ रोजी अतारांकित प्रश्न उपस्थित केला होता. त्यावर केंद्रीय परराष्ट्र राज्यमंत्री मेजर जनरल व्ही. के. सिंह यांनी लेखी उत्तरात, पोस्ट ऑफिसमध्ये पासपोर्ट सेवा केंद्र योजनेचा भविष्यात विस्तार करण्यात येणार असल्याचे स्पष्ट केले होते. त्याला अनुसरून खासदार रामदास तडस यांनी वेळोवेळी वर्धा येथे पोस्ट ऑफिस पासपोर्ट सेवा केंद्र सुरू करण्याबाबत विनंती केली होती. परिणामी १४९ नवीन पोस्ट ऑफिस पासपोर्ट सेवा केंद्र स्थापन करीत असताना त्यामध्ये प्रामुख्याने वर्ध्याचा समावेश करण्यात आला.
खासदार तडस यांनी या पासपोर्ट सेवा केंद्राचे कामकाज लवकरात लवकर सुरू करावे यासाठीदेखील परराष्ट्र मंत्रालयातील अवर सचिव श्री. शर्मा यांची भेट घेऊन विनंती केली होती. वर्धा येथे पोस्ट ऑफिस पासपोर्ट सेवा केंद्र मंजूर करून अनेक वर्षांपासून प्रलंबित असलेला मुद्दा निकाली काढल्याबद्दल खासदार तडस यांनी समाधान व्यक्त करून परराष्ट्र मंत्री सुषमा स्वराज आणि परराष्ट्र राज्यमंत्री मेजर जनरल व्ही. के. सिंग यांचे आभार मानले.
